الشعب ح يا كل ايه

الشعب هياكل ايه؟



والله يا عدس غليت# وبقيت بتمانيه جنيه

مبقتش تخش البيت# والشعب ح ياكل ايه

والعيش مابقاش ف طابونه# والقوطه بقت مجنونه

غلليت حته المكرونه# والرز بقى بأبونيه
----------------------------
الله يسمحك يا لحمه# ياللى مخصمه الغلابه

غلا وغليان ورحمه #والدنيا ح تبقى غابه

لا دقيق ولا قمح كافى #والشعب ح يبقى حافى

قايده النار والمطافى #شله لصوص وديابه
-----------------------------
حتى انت غليت يا زيت# خليت الشعب داخ

والموز مبقاش فى البيت# ولا هو ولا الفراخ

والخوخ والبرتقان# حتى الجرجير كمان

ناقص يغلى اللبان# يا خونا الوضع باخ
-----------------------------
يا اهل الحكمه الحقونا# شبابنا جت لها خصه

عاوزين تجــــوزونــا #خلولنا الشبكه فضه

دى الفرحه بقت سراب# والعيشه بقت هباب

شمتت فينا الكلاب# ولكل كلب عضه
-----------------------------
هنبنى طوبه طوبه# والطوبه بقت بكام

يا دبله الخـــطوبه# بقيتى ليله حرام

كله ف مشاكله هايم# وبقينا فى هم دايم

لو كنا يا ناس بهايم# مين فى ايده اللجام؟

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
يا رب تكون القصيده عجبتكم انا شوفتها مع واحد وهيا مقطعه وخدها منه وجبتهلكم

يا رب تعجبكم

محمود هندى